Stony sea urchin

O ourizo é de cor escura, con tendencia ás cores negra, verde e violeta. Ten unhas púas robustas e aguzadas que, ao caeren, deixan ver un corpo dividido en grupos de placas. O corpo do ourizo non é totalmente esférico, senón que está algo achatado polas zonas da boca e do ano. As gónadas femininas son de cor amarela forte ou alaranxadas; as masculinas, amarela clara ou parda.

A súa captura está regulada mediante plans de explotación específicos para esta especie aprobados anualmente. Pode collerse a pé ou dende embarcación utilizando bicheiro ou forquita axudados dun espello ou mirafondos, esta arte soamente pode ser utilizada en fondos inferiores a cinco metros. Tamén pode ser extraído mediante mergullo en apnea ou con aire dende superficie. As capturas concéntranse entre outubro e abril.

Do ourizo só se toma a gónada ou glándula reprodutora que está no seu interior. Na Costa da Morte din: "cando o cuco cuca, o ourizo está cucado", porque na primavera xa lle pasou o tempo. A cociña clásica aposta por tomalos crús, abrindo o ourizo con coidado e metendo a culler.

A cociña moderna incorporouno en mollos que acompañan peixes aos que lles multiplica os recendos a mar. Cos ourizos prepáranse tamén conservas, patés, revoltos, maionesas...