Curry de choco
(4 persoas)
- 2 Chocos de Kg
- 1 bulbo de fiúncho
- 1 ceboliña fresca
- 1 allo porro
- 2 dentes de allo
- 30 gramos de xenxibre fresco
- 1 folla de loureiro
- 1 chile verde
- 2 follas de lima kaffir
- 1 rama de citronela
- 1 presa de coandro picado
- 150 gramos de salsa de tomate
- 120 gramos de Golden Curry hot (pastillas de curry xaponés)
Preparación:
Quitamos as vísceras e reservamos. Retiramos pel e aletas e reservamos tamén para o caldo.
Retiramos a cabeza e con moito coidado os aros duros das ventosas dos tentáculos. Picamos.
Abrimos o corpo do choco e quitamos as peles coa axuda dunha puntilla e un cacho de papel. Cortamos en dados.
Para o caldo:
Poñer nunha pota con 2 l e medio de fumet ou auga os interiores do choco picados a grosso modo, as aletas e as peles. Engadir o verde da ceboliña, do allo porro e do fiúncho, un dente de allo pelado, a folla de loureiro, a citronela e os talos de coandro picados. Cocer 45 minutos, triturar o conxunto e coar.
Picar o allo, o xenxibre restante, rustrir. Incorporar o fiúncho, a ceboliña e o allo porro. Laminar o chile sen pebidas e engadir tamén. Unha vez rustridos incorporar o choco e refogar.
Mollar cun chorro de albariño e tapar. Deixaremos cocer 15 minutos ata que se reduzan todos os mollos do choco e o viño. Incorporar agora o tomate e cocer 5 minutos máis. Nese momento mollaremos co caldo coado que elaborariamos anteriormente, engadimos a pastilla de curry e deixamos cocer 30 minutos máis ata que a carne de noso choco estea tenra e saborosa. Poñer a punto de sal e incorporar follas de coandro picado xusto antes de retirar.
Para o empratado final, dispoñer sobre o guiso follas de albáfega, menta, coandro e aneto, así como unhas láminas pequenas de chile verde.
É interesante acompañalo dunhas patacas cocidas ou un arroz branco, a nosa salsa daralle toda a personalidade.
Receita de Lucía Freitas de A Tafona by Lucía Freitas (1 Estrela Michelín) e Lume Santiago by Lucía Freitas.
