Arroz verde cremoso de raia con polbo e boletus
INGREDIENTES
2 racións:
- 150 g de arroz bomba
- 150 g de raia
- 100 g de polbo cocido
- 50 g de boletus
- 1 cebola pequena
- 80 g de espinacas
- 20 g de manteiga
- Sal, pementa
- 50 g de queixo parmesano relado
Paco Caneda, profesor do Obradoiro de Emprego de Hostalaría da Mancomunidade do Salnés, achéganos unha das súas creacións máis especiais: un arroz verde cremoso de raia e polbo con boletus. A receita foi unha das súas creacións para a Festa da Raia de Portonovo (Sanxenxo), e combina tradición mariñeira e creatividade culinaria nun prato cheo de sabor e color.
Elaboración
- Escaldamos 80 gramos de espinacas nun cazo con 2 litros de auga a ferver durante 2 minutos; a continuación, coamos e gardamos a auga. Trituramos as espinacas ata formar unha crema.
- Cocemos a raia na auga de escaldar as espinacas, retiramos e reservamos o caldo.
- Engadimos un pouco de aceite no recipiente onde imos elaborar o arroz e rustrimos a lume lento a cebola picada finamente; incorporamos os boletus picados. Unha vez estea rustrido, incorporamos o arroz e mesturamos todo. Engadimos a crema de espinacas, damos unhas voltas e engadimos pouco a pouco a auga das espinacas a ferver, deixando repousar a preparación entre cada incorporación.
- A media cocción incorporamos o polbo picado e a raia desmiuzada. Traballamos sen deixar de remover ata que o arroz estea no seu punto.
- Engadimos a manteiga e o queixo relado e rematamos a cocción, de maneira que quede un arroz cremoso.
- Servimos quente, decorando ao gusto.
