Xarda con curry fresco e ensalada de rúcula
Ingredientes para catro persoas:
- Dúas latas de xarda en aceite de oliva
- 25 gramos de rúcula
- Ceboliño
Para a salsa de curry fresco:
- Dúas culleradas de aceite de oliva virxe extra
- 200 ml de leite desnatado
- Unha cullerada de fariña de trigo
- Media cullerada de curry en po
- Un chisco de xenxibre en po
- Un chisco de sal
- Vinagre de mazá ao gusto (polo menos un par de culleradas)
Chema García, de El Faro Gastronómico, tráenos unha receita cun dos seus peixes favoritos, tanto en fresco como en conserva: a xarda, que ademais é un dos produtos destacados da pesca artesanal galega.
“Trátase dunha receita de xarda con curry fresco e ensalada de rúcula, cunha salsa que adoitaba preparar para as degustacións na Feira da Conserva de Vilanova e que aplicaba a case calquera peixe azul en conserva: agullas, sardiñas, sardinillas, chinchos e, por suposto, xarda”.
A base é unha bechamel á que lle engadimos curry e vinagre de mazá para darlle un toque fresco. Para a parte verde, utilizamos rúcula e ceboliño, aínda que tamén se poden empregar outras leitugas ou brotes ao gusto.
Preparación:
Se queres aforrar tempo, podes mercar a bechamel xa feita, hai varias opcións en formato brik que funcionan ben.
Se prefires facela desde cero, quenta o aceite, engade a fariña e dóraa lixeiramente. Incorpora o curry, o xenxibre, un pouco de sal e o leite quente pouco a pouco, removendo cunhas variñas ata obter unha salsa ben ligada. En poucos minutos debería estar lista, pero podes deixala un pouco máis ata que espese, sen deixar de remover.
Unha vez fría, engádelle o vinagre de mazá, que lle dará frescura.
Presentación:
Na base do prato coloca dúas culleradas da salsa, enriba a xarda e o ceboliño picado finamente. Acompaña cunha manchea de rúcula aliñada co aceite da lata e vinagre de mazá.
Esta receita tamén se pode elaborar con xarda fresca. Nese caso, basta con retirarlle a espiña central e pasar os lombos pola prancha antes de montar o prato.
