Pastel de escacho
INGREDIENTES
- 1 escacho de 800 g-1 quilo
- 4 ovos
- 500 ml de nata líquida (36 % M.G.)
- 170 ml de tomate triturado en conserva
- 25 g de cebola
- 20 g de cenoria
- 1 dente de allo
- Pan relado
- Aceite de oliva
- Sal
- Pementa negra moída
- Azucre
- Ourego
Ricardo Fernández, cociñeiro e profesor dos ciclos de formación profesional de cociña no CIFP Carlos Oroza de Pontevedra, propón unha receita de pastel de escacho sinxela e chea de sabor. Unha elaboración versátil que tamén se pode preparar con outros peixes, perfecta para poñer en valor o produto do mar e adaptala ao que ofrece a tempada.
Elaboración
Preparar unha salsa de tomate:
- Pelar e picar finamente a cebola, a cenoria e o allo.
- Nun cazo pequeno, quentar o aceite e dourar lixeiramente o allo.
- Engadir a cebola e a cenoria e refogar ata que estean brandas.
- Incorporar o tomate triturado, baixar o lume e cocer suavemente durante 20–25 minutos.
- Triturar a salsa ata que quede fina. Salpementar, engadir ourego ao gusto e, de ser preciso, un chisco de azucre.
Para elaborar o pastel:
- Cocer o peixe en auga con sal ou ao vapor. Escorrer ben, retirar peles e espiñas e desmigalo.
- Nun bol grande mesturar a natalíquida, os ovos, a salsa de tomate e o peixe desmigado.
- Engraxar un molde tipo pudin con aceite e espolvorear con pan relado.
- Verter a mestura no molde e cocer no forno ao baño maría a 160 ºC durante 30 minutos.
- Deixar que atempere antes de desmoldar. Pódese servir morno ou frío.
