Pani puris recheos de bechamel de alga Wakame e cogomelos Portobello
Ingredientes:
- Obleas de pani puri para fritir
- 1 cebola
- 40 g de aceite de oliva suave
- 30 g de fariña de trigo
- 30 g de manteiga
- 700 ml de leite
- 100 ml de nata
- 30 g de wakame deshidratado
- 250 gramos de cogomelos Portobello
- 1 cullerada pequena de sal
- 1 chisco de pementa negra
- Noz moscada ao gusto
- 1 cullerada grande de queixo de cabra, San Simón ou outro, ao gusto
Esta receita foi unha das favoritas do público asistente ao Obradoiro de cociña con Algas e Mariscos organizado pola OPP20 Illa de Arousa e impartido por Mariví Otero, cociñeira do Chiringuito Coco Bao de Illa de Arousa.
Elaboración:
Nunha picadora trituramos as algas en pequenos anacos e a continuación hidratámolas nun bol con auga durante cinco minutos.
Cortamos os cogomelos en anacos pequenos e reservamos.
Preparamos a bechamel: nunha tixola ou tarteira poñemos o aceite de oliva, a manteiga e a cebola previamente picada en brunoise, e sofritimos 6 minutos aproximadamente.
Engadimos os cogomelos e elaboramos ata que perdan auga; despois o wakame ben escorrido de auga, deixamos que se faga uns minutos e xa incorporamos a fariña. Mesturamos ben a fariña co resto dos ingredientes durante aproximadamente dous minutos, e logo agregamos o leite mesturando ben.
Cando a bechamel adquira corpo, engadimos a nata, removemos e incorporamos o queixo, removendo ata que estea completamente mesturado.
Finalmente, engadimos pementa, noz moscada e sal ao gusto.
Introducimos a bechamel nunha manga e enchemos as obleas previamente fritas.
