Empanada de millo corvo e peixe

Preparación:

O primeiro para facer unha boa empanada de millo corvo é o peixe. Este debe cortarse todo a unha medida da mesma altura, sexa en toros ou abríndoo ao medio, apenas un chisquiño máis fino que se o cortamos para cocer. A continuación salprésase, poñéndolle por enriba un pouquiño de sal.

Despois prepararemos a masa. O millo corvo é un dos tipos de millo do país que hai en Galicia. A espiga é larga e os grans completamente negros, moi pretos uns aos outros. A fariña é color viño ou violeta e a masa dun sabor parecido ao do millo branco do país, pode que menos bravo incluso.

Para facer a masa, engádeselle un puñado de fariña de trigo ou centeo á de millo (1/4 parte de fariña de centeo u trigo), para que esta sexa mais dondiña, máis fina. Mestúrase con auga temperada, nunca fría e tras obter unha mestura dunha consistencia similar á da masa de biscoito, deixase repousar mentres se fai o sofrito coas cebolas e a salsa de tomate.

Unha vez feito o sofrito, collerase a empanadeira ou recipiente onde a imos a facer e refregarase todo o interior cun anaquiño de unto de porco. A continuación, mollarase toda a mesma  superficie con aceite de oliva.

Será o momento de poñer a primeira capa de masa no recipiente, ca axuda dunha culler para votala e un garfo para ila estendendo nunha capa fina, que apenas tape o fondo da empanadeira, para que quede ben fina. A continuación estenderemos unha capa de sofrito e encima, o peixe, cubrindo toda a superficie.

Unha vez posto todo o peixe, verteráselle encima un pouco de sofrito máis, que debe encher os pequenos ocos entre o peixe e apenas mollalo por enriba. Para finalizar, ponse a segunda capa de masa, tratando de que sexa moi fina, co mesmo procedemento, unha culler para colocala en montonciños e un garfo para estendela con coidado, para que tape todo pero sen remexer a salsa do sofrito nin o peixe.

Remátase empoando un pouco de fariña de millo corvo para que chupe o excedente de aceite que poda asomar por riba, e sele toda a capa superficial.

A continuación, métese ao forno ata que estea cocida.

Toda a elaboración debe de ser feita co mesmo coidado e mimo co que as nais e as avoas das casas dos mariñeiros facían e seguen facendo de comer ata o dia de hoxe para as súas familias.