Cilindro de congro en tempura negra, crema de coliflor afumada e pesto de algas

FacebookTwitter
Cilindro de congrio en tempura negra
INGREDIENTES

Ingredientes (4 persoas):

  • 500 g congro en lombos desespiñado e limpos. Cortado en anacos de aproximadamente 60 gramos.
  • 200 gramos de fariña de arroz
  • 100 ml de auga con gas, ou cervexa, ou calquera bebida con gas
  • tinta de calamar, cantidade necesaria
  • 1 coliflor
  • 300 ml leite vexetal
  • 40 gramos de noces, piñóns ou améndoas (crús, limpos e sen pel)
  • 1 dente de allo
  • 2 follas alga nori ou 10 gramos de wakame
  • 1 culleriña de pemento afumado DE LA VERA
  • AOVE , sal e limón

Alberto Carou, xefe de cociña do Restaurante Curral do Marqués de Rianxo, ensínanos como preparar unha receita combinando un peixe de sabor extraordinario, con verduras, froitos secos e algas.

O resultado é un prato nutricionalmente equilibrado elaborado con produtos do mar aportando efectos positivos para a saúde cardiovascular, o desenvolvemento neurolóxico e o benestar xeral.

 

Elaboración:

1. Crema de coliflor con leite vexetal e pemento: Dourar o allo e a coliflor no AOVE nunha marmita. Engadir o leite vexetal e aderezar con sal e pemento ao gusto. Cando estea cocida a coliflor, triturar e reservar. Se a queremos máis espesa, engadir pataca cocida e triturar. Reservar

2. Tempura negra con tinta: nun bol engadir a fariña de arroz e a bebida con gas e tinta de calamar ao gusto ata acadar unha cor escura. Mesturar cunha variña ata obter unha masa de fritura sen grumos. Podemos aderezar cun pouquiño de sal e azucre. Reservar.

3. Pesto de algas con froitos secos: Nun vaso batedor colocar a alga nori, AOVE, sal, limón e os froitos secos e 100 ml de auga fría. Triturar todo. Aderezar con sal e pementa ao gusto. Reservar e colocar en manga pasteleira ou biberón.

4. Fritura do congro: Rebozamos os anacos de congro en fariña de arroz, despois na masa da fritura de tempura e fritimos en aceite a 180 º. Reservar en papel absorbente.

Montaxe:

Quentamos a crema da coliflor e poñemos un cullerón na base do prato. Colocamos en riba o congro en tempura negra e uns puntiños de pesto en riba para decorar. Podemos aderezar con sal, pementa ou pemento.