Albóndegas de choco

FacebookTwitter
pescadeRias
INGREDIENTES

Para 4 persoas:

Para as albóndegas

  • 1 quilo de chocos (aproximadamente 750 g de choco limpo)
  • 1 barra de pan
  • 300 ml de leite enteiro
  • 1 ovo
  • 200 g de cebola picada
  • 1 dente de allo picado
  • Sal

Para a salsa

  • 1/2 cebola
  • 2 dentes de allo
  • 100 g de pemento verde italiano
  • 100 ml de viño branco
  • 1 bolsa de tinta do choco
  • 400 ml de fumet de peixe (ver instrucións)
  • Sal

Para o fumet de peixe

  • 1 quilo de espiñas ou recortes de peixe
  • ½ kg de cebola en dados
  • ½ kg de cenorias
  • 220 g de porros
  • 50 ml de aceite de oliva virxe extra
  • 100 ml de viño branco
  • Bouquet garni (ingredientes e instrucións a continuación)
  • 4 litros de auga

Para o bouquet garni

  • 4 follas de loureiro
  • 1 feixe de tomiño
  • 1 feixe de perexil
  • 100 g de porro (opcional)

Alberto Ribas, creador de contidos de gastronomía e turismo, e do blog Alvientoooo, invítanos a cociñar estas albóndegas de choco que aprendeu a elaborar do cociñeiro e profesor de cociña Ricardo Fernández. Alberto, a quen lle gusta innovar e arriscar na cociña, aposta polo choco como un dos seus ingredientes favoritos.

Elaboración

Preparar o fumet.

Compoñer o bouquet garni: Lavar ben as herbas e retirar o exceso de auga. Envolver o tomiño e o perexil nas follas de loureiro e, a continuación, envolver este paquete coa folla de porro e pechar ben. Bridar con fío e atar firmemente.

Nunha pota, facer suar no aceite a cebola, a cenoria e o porro cortados en dados. Engadir as espiñas de peixe e facelas suar uns minutos xunto coas hortalizas. Incorporar o viño branco e reducir lixeiramente. Engadir a auga e o bouquet garni e levar a ebulición; retirar a escuma con coidado e deixar cocer suavemente uns 20 minutos. Coar e reservar.

Facer a masa das albóndegas. Mentres se coce o fumet, picar moi fino o choco, o allo e a cebola. Remollar o pan no leite. Nunha tixola cun pouco de aceite, rustrir a cebola e o allo picados. Mesturar nun bol o choco, o pan escorrido, o allo e a cebola rustridos e o ovo. Salgar ao gusto ata obter unha masa homoxénea.

Formar e dourar as albóndegas. Formar boliñas duns 15 g (do tamaño dunha noz) e fritilas nunha tixola con aceite ata que estean douradas por fóra. Retirar e reservar sobre papel.

Preparar a salsa. Nunha cazola, rustrir media cebola, o allo e o pemento verde picados. Cando estean brandos, engadir o viño branco e deixar reducir uns minutos. Incorporar a tinta do choco e cubrir co fumet. Cociñar durante 10 minutos, triturar e pasar a salsa por un coadoiro chinés para que quede fina. Axustar de sal. Introducir as albóndegas na salsa e deixar que se cociñen suavemente 2–3 minutos para que se impregnen ben de sabor.