Abadexo ao forno con salsa de tomates asados e repolo

O cociñeiro Xoanqui Ameixeiras tráenos dúas versión dunha receita con abadexo, salsa de tomates asados e repolo. Unha combinación de peixe branco con verdura de tempada, e con altos valores nutricionais. O prato tamén pode elaborarse con outros peixes brancos dispoñibles no mercado, so temos que adaptar os tempos de cocción con respecto ao tamaño do peixe que vaiamos cociñar.

Elaboración

Preparación do peixe:

Limpamos o abadexo e retiramos os lombos. Reservamos o cocote coa cabeza para outra elaboración e as espiñas para un caldo. Os lombos serán os que utilizaremos para a receita.

Preparación da salsa de tomates asados:

Partimos os tomates en anacos grandes e aliñámolos con ourego, allos moi picados, sal e aceite de oliva. Colocámolos nunha bandexa de forno e asámolos ata que estean ben brandiños. Retiramos a pel, machucámolos cun garfo e reservámolos con tódolos xugos que soltou no asado.

Nunha tixola co fondo cuberto de aceite de oliva, fritimos os allos picados e as cebolas en xuliana fina ata que collan unha cor torrada. Incorporamos os tomates asados con tódolos xugos. Corriximos a acidez do tomate co azucre e incorporamos as olivas, as alcaparras e as anchoas. Salgamos e se precisase, corriximos o espesor con caldo de peixe ou auga. Reservamos deixando atemperar para concentrar sabores.

Opción 1. Para facer sacos co repolo: 

Escaldamos as follas de repolo en auga fervendo uns minutos ata que poidamos manexalas para facer os sacos. Sacámolas a auga con xeo para cortar a cocción e conservar a cor. E secámolas.

Asentamos a folla de repolo, enriba poñemos o anaco de lombo de abadexo e pechamos cos bordes da folla. Asentámolos nunha bandexa de forno coa parte “bonita” cara arriba e cubrímolos coa salsa. Enfornamos uns 25 minutos a 200º e no empratado engadimos alfábega picada.

Opción 2. Para facer abadexo en salsa de tomate, acompañado co repolo:

Asentamos os lombos de abadexo nunha fonte de forno enriba dunha capa de cebola fritida, cubrimos coa salsa e enfornamos 20 minutos a 200º.

Nun wok ou tixola co fondo de aceite de oliva fritimos moi lixeiramente 2 dentes de allo e o xenxibre, incorporamos o repolo e a cenoria en xuliana e salteamos durante uns 5 minutos: Se vemos que se nos agarra no fondo metémoslle un pouco de auga, e seguimos salteando ata que a auga evapore. Cando estea casi listo incorporamos a salsa de soia, o sal e a pementa ao gusto, mesturamos ben e reservamos en quente.

Empratamos poñendo un fondo do salteado de repolo e cenoria. Enriba un lombo de abadexo coa salsa de tomate e finalmente alfábega picada.