FacebookTwitter

Salmonete de rocha

Salmonete de rocha

Dous aspectos característicos definen esta especie: as cores vermellas do seu corpo, que varían segundo a época do ano, e a súa barbicha, que usa para detectar e desenterrar os moluscos e crustáceos que lle serven de alimento. As diferenzas máis visibles entre este e o salmonete de lama son que o da pedra ten un rostro máis oblicuo e presenta tres ou catro bandas amarelas ao longo do corpo e a cor é xeralmente máis escura. Reprodúcese entre os meses de maio e xullo e pode chegar a medir ata 40 centímetros, aínda que o normal é que midan entre os 18 e os 25 centímetros.

Habita fondos de pedra e area ata os 25 metros de profundidade. As capturas non son abundantes, empregándose a arte do trasmallo e as betas. Tamén é un peixe "de cordel": úsase a liña.

Este peixe pode prepararse sen limpalo previamente, xa que non posúe bile e, polo tanto, todo el ten un delicado sabor. Fritido ou ao forno, con algunha especie do seu gusto, ofreceralle moito máis do que o seu pequeno tamaño promete.

Datos da especie

  • Código FAO: MUR
  • Nome científico:Mullus surmuletus
  • Nome galego: Salmonete de rocha
  • Nome castelán: Salmonete de roca
  • Grupo biolóxico: Peixes
Salmonete de rocha
  • Tamaño mínimo: 15 cm
  • Forma de medición: O tamaño medirase desde a punta da cabeza ata o extremo da aleta caudal