Vostede está aquí

Muxo escabechado con allos tenros, rabaniños e alga wakame Imprimir

Muxo escabechado con allos tenros, rabaniños e alga wakame
Ingredientes

Ingredientes (para catro persoas):

  • 1 muxo (1 quilo)
  • 8 allos tenros
  • 2 dentes de allo
  • 2 cenorias
  • 1 folla de loureiro
  • Pementa en gran
  • 1 litro de aceite de oliva
  • 300 mililitros de vinagre de mazá
  • 250 mililitros de viño alvariño
  • Sal
  • Pementa moída
  • Brotes de álsine ou outros
  • 10 g de wakame deshidratado
  • Romeu
  • 4 rabaniños

O muxo é un peixe de boa calidade e un excelente sabor ao que acompaña unha inmerecida mala fama debido á súa presenza en portos e outras zonas próximas a núcleos urbanos. O que atopamos no mercado provén de augas abertas e podemos consumilo con todas as garantías.

Durante o showcooking organizado pola Asociación de Empresarios Grovenses de Bens e Servicios (EMGROBES) durante a última edición da Festa do Marisco do Grove, Francisco Caneda, responsable de cociña da festa e profesor de cociña, mostrounos como preparalo escabechado.

                                                                                                                                                                                                                                                                                                                                         

Preparación:

En primeiro lugar hidratamos o wakame por espazo de 10 minutos e cocémolo durante 20 minutos, escoamos, cortamos en anacos e reservamos.

Fileteamos o muxo, salpementamos e marcámolo en prancha pola parte da pel. Reservamos.

Pelamos a cenoria e torneamos, engadimos o aceite cos allos tenros, o loureiro, os grans de pementa, os allos e o wakame. Confeitamos a baixa temperatura.

Engadimos o vinagre e o viño, damos un fervor e retiramos do lume. Incorporamos o muxo e deixamos no escabeche ata arrefriar por completo. Gardámolo en cámara a macerar por espazo de un ou dous días.

Servimos decorando coas cenorias, allos tenros, os rabaniños e os brotes de álsines.

Como suxestión podemos substituír os brotes de álsines por escarola e os allos tenros por ceboliña á xuliana. Pódeselle engadir vinagre de Xerez.

 

Compartir en redes sociais