Arroz con Lumbrigante

Introducción

O arroz con lumbrigante é unha das máis prezadas receitas deste exquisito marisco, que non require demasiado tempo nin presenta unha excesiva dificultade, polo que resultará unha fantástica elección se queremos sorprender aos nosos convidados.

Elaboración

Antes de comezar coa receita, debemos de indicar que previamente teremos preparado un caldo ou fumet de peixe, que faremos cocendo durante aproximadamente unha hora dúas cabezas de peixe cun allo porro e unha cenoria en anaquiños. Unha vez preparado o caldo, reservámolo.

Para o noso prato, o primeiro que faremos será cortar o lumbrigante. Esta é a parte máis desagradable do proceso, posto que temos que facelo co animal aínda vivo. O que faremos será separar o corpo da cabeza e cortar esta última en dous. Co corpo faremos anacos de aproximadamente tres centímetros de grosor. Aproveitamos todo o mollo que poida soltar ao cortalo e reservamos.

A continuación, nunha cazola de barro grande refogamos durante uns minutos o lumbrigante nun chisco de aceite de oliva virxe extra, xunto co mollo resultante do corte. Despois dun par de minutos retiramos as pezas de lumbrigante e pasámolas a un prato, que reservaremos.

Por outra banda, picamos a cebola, o allo , o perexil e o pemento moi finos. Trituramos os tomates axudándonos dun relador ou simplemente pelándoos e tallándoos en dados moi pequenos, sen que se perda o seu mollo.  Engadimos cebola, allo, pemento e perexil ao aceite no que anteriormente sofritimos o lumbrigante e deixamos que se cociñe ata que a cebola empece a dourarse. A continuación, engadimos o tomate e deixamos ao lume cinco minutos máis.

Por último, incorporamos o arroz e o pemento doce. Deixamos refogar a mestura uns segundos e a continuación engadimos o azafrán, o lumbrigante e o caldo de peixe. Deixamos que se cociñe todo durante uns 15-20 minutos e, tras retiralo do lume, deixaremos que repouse cinco minutos máis.