Gracilaria, spp

Talo de ata 60 centímetros, de cor parda vermella ou púrpura, verdosa ou branquexada e de consistencia cartilaxinosa. Fíxase mediante disco basal do que parten eixos principais cilíndricos ramificados. As estruturas reprodutoras esféricas son moi prominentes. Atópase no infralitoral, litoral inferior ou pozas do litoral medio de costas protexidas ou semiexpostas. Soporta a presenza de area e variacións de salinidade. É a especie máis usada para obter agar. Tamén se usa como abono e na alimentación humana. Ten propiedades antibacterianas.