A entidade do mes: Pescados Loureda

A entidade do mes de outubro é Pescados Loureda S.L., certificada pola marca pescadeRías de onde se non? desde novembro de 2024 para peixe, cefalópodos, crustáceos e bivalvos. Con sede no porto da Coruña, a empresa merca diariamente en diversas lonxas galegas, garantindo frescura, trazabilidade e calidade nos produtos da pesca artesanal galega.

Especializada no abastecemento de comedores escolares, hospitais e outras colectividades, destaca pola súa aposta por un modelo responsable baseado na estratexia Desperdicio Cero. Ofrece máis de cen referencias e máis de vinte tipos de preparacións de peixe fresco e aporta valor pola súa capacidade de aconsellar e acompañar á súa clientela.