little tunny

A bacoreta (Euthynnus alletteratus) é un peixe peláxico da familia dos escómbridos, de corpo robusto, fusiforme e moi hidrodinámico, adaptado á natación rápida. Presenta o dorso de cor azul escura cun patrón de liñas onduladas, mentres que os flancos e o ventre son prateados. Un dos seus trazos distintivos é a presenza de varias manchas negras entre as aletas pectorais e pélvicas. Pode alcanzar máis de 1 metro de lonxitude e superar os 12 kg de peso, aínda que os exemplares capturados habitualmente son de menor tamaño.

É unha especie epipeláxica, que vive tanto en augas oceánicas como costeiras de clima tropical e temperado, ata os 150 m de profundidade. Forma cardumes, xeralmente de exemplares de tamaño similar, e adoita frecuentar zonas próximas á costa, especialmente onde existen correntes intensas, afloramentos ou cambios de temperatura da auga.

A bacoreta é un depredador rápido e oportunista. A súa dieta está composta principalmente por pequenos peixes peláxicos, ademais de crustáceos, cefalópodos e outros invertebrados mariños.

En Galicia a súa presenza é estacional, sendo máis frecuente durante a primavera e o verán, cando o aumento da temperatura da auga favorece a súa chegada ao litoral. As capturas realízanse principalmente con artes de cerco e anzol, e destínanse polo xeral á transformación en conserva.