Vostede está aquí

Guiso de sardiñas escochadas Imprimir

Sardiñas escochadas
Ingredientes

Ingredientes para catro persoas:

  • 12 sardiñas sen cabeza e sen vísceras
  • 4 patacas cortadas en rodas moi finas
  • 1 tomate e medio maduro
  • 1 cebola e media
  • ½ pemento verde
  • 1 vaso de aceite de oliva
  • 1 vaso de auga
  • 1 anaco de unto
  • 2 dentes de allo
  • 1 culler grande de pemento doce
  • Sal

O Grupo de Acción Local de Pesca Ría de Pontevedra facilítanos esta preparación de sardiñas, apta tanto para principiantes como para cociñeiros e cociñeiras experimentados. Publicada orixinalmente no Receitario Gacstroderías 2013, por cortesía do Restaurante A Taberna de Alvariñas, de Combarro (Poio).

Preparación:

Verter o aceite e o pemento doce nunha pota de barro e mesturar ben. Incorporar en cru todos os ingredientes cortados menos as sardiñas e a auga.

Mesturar todo ben e colocar as sardiñas escochadas enriba. Tapar a pota e poñela a lume vivo, movéndoa a miúdo. Unha vez que ferva, engadir o vaso de auga, baixar a lume medio e esperar a que as patacas estean no seu punto.

NOTA: Para escochar as sardiñas hai que collelas polos dous extremos e empuxar cara ao centro, tratando de xuntar as mans, de xeito que a espiña central se deforma en zig-zag.

Compartir en redes sociais