Raia cravuda

Rostro curto e redondeado e bordes anteriores lixeiramente sinuosos. A superficie dorsal está cuberta de denticulacións. As femias presentan entre 30 e 50 espiñas na liña mediodorsal e o número é menor nos machos. Tamén presentan na cara dorsal do disco algunhas espiñas grandes e curvadas, tamén presentes na cara ventral das femias. A cor é moi variable, dende o gris ao marrón claro con manchas escuras que se unen formando liñas sinuosas. Ás veces ten un par de ocelos amarelentos bordeados de gris. Pode alcanzar 1 m de lonxitude.

É unha especie moi común en augas superficiais e ata os 300 m de profundidade, tanto no Mediterráneo como nas costas atlánticas ibéricas.