Rosa Quintana entrega a certificación PescadeRías ao grupo Cerdeimar e á Confraría de Camariñas.

Cerdeimar

Camariñas (A Coruña), 06 de xullo de 2013. A conselleira do Medio Rural e do Mar, Rosa Quintana, entregou esta mañá en Camariñas a certificación pescadeRías á Confraría e a Industrias Cerdeimar, que dá fe da frescura dos peixes e mariscos procedentes desta Ría comercializados baixo o nome de Mariscos de Camariñas.

O proxecto de Mariscos de Camariñas é o resultado dun esforzo conxunto, do Grupo Cerdeimar e da Confraría de Camariñas, para prover o mercado dun produto de calidade e froito da pesca artesanal.

A conselleira destacou, durante a inauguración das novas instalacións da depuradora de mariscos da fábrica de Cerdeimar, o compromiso que esta unión significaba como aposta social e de futuro. No acto estaban presentes o director xeral do Grupo Cerdeimar, Andrés Cerdeiras, e o patrón maior da Confraría de Camariñas, José Manuel Gerpe.

Rosa Quintana tamén apuntou durante a súa intervención as vantaxes que supón este proxecto de industria e pescadores profesionais para a valorización do produto da Ría de Camariñas. Unha valorización que permitirá unha maior rendibilidade cun menor esforzo pesqueiro e laboral.

O Grupo Cerdeimar comprometeuse á adquisición do 80% da produción da Confraría, incorporando unha nova liña de produtos exclusivos da Ría, mentres que a asociación de pescadores obterá a autorización para certificar o seu produto.

A certificación pescadeRías é unha marca de calidade que actualmente agrupa a preto de 100 empresas, de maioristas, lonxas, empresas de transformación e restaurantes.